(Mushterka Khandani Nizam Aor Islam Ka Nazarya) مشترکہ خاندانی نظام اوراسلام کا نظریہ

اسامہ شعیب علیگ

ریسرچ اسکالر ، جامعہ ملیہ اسلامیہ ،دہلی

 کسی بھی ملک میں استحکام کے لیے صالح معاشرے کا ہونا ناگزیر ہے اور ایک صالح معاشرہ تب ہی وجود میں آ سکتا ہے جب اس میں صالح خاندان موجود ہوں اور ان میں رہنے والے ایک دوسرے کے حقوق و فرائض سے واقف ہوں ۔ قرآن و حدیث میں اس کی طرف مکمل طور سے رہنمائی کی گئی ہے ۔ ضرورت اس بات کی ہے کہ ان کی تعلیمات و احکام کوجانا جائے اور ان پر عمل کیا جائے۔

خاندان کی تعریف

An Essentail English Dictionaryمیں خاندان کی تعریف درج ذیل ہے:

"A Family Is a Set Of People Related To One Another Especially a House Hold Consisting Of Parents And Childrens"

’’خاندان لوگوں کے ایک ایسے مجموعے کو کہتے ہیں جو ایک دوسرے سے تعلق رکھتے ہیں۔ خصوصا ایسا گھر جو والدین اور بچوں پر مشتمل ہو‘‘

ایک خاندان زوجین،اولاداور والدین سے تشکیل پاتاہے۔ان لوگوں کے ایک دوسرے پر کچھ حقوق و فرائض ہوتے ہیں جن کے بغیرایک اچھے خاندان کا وجود میں آنا ممکن نہیں۔ جس طرح سے حکومت کو چلانے کے لیے ایک سربراہ کی ضرورت ہوتی ہے اسی طرح ایک خاندان کو صحیح ڈھنگ سے چلانے کے لیے ایک سربراہ کی ضرورت ہوا کرتی ہے۔اب سوال یہ ہے کہ خاندان کا سربراہ کون ہو؟

اگر مرد اور عورت کی فطری صلاحیت ،قوت ،عادت و اطوار اور مخصوص مسائل پر غور کیا جائے تو یہ بات واضح ہو جائے گی کہ مرد کوعورت پر مختلف وجوہ سے فوقیت حاصل ہے۔

قرآن اسی کو ان الفاظ میں بیان کرتا ہے:

وللرجال علیھن درجة(البقرة(228:

’’اور مردوں کو عورتوں پر ایک گونہ برتری حاصل ہے‘‘

اور یہ برتری اس طرح سے کہ:

الرجال قوامون علی النساء(النساء:34)

“مرد عورتوں کے سربراہ ہیں”

یہ سربراہی کیوں ہے ؟ قرآن نے ساتھ ہی اس کی وجہ بھی بتا دی ہے:

بما فضل اللہ بعضھم علی بعض و بما انفقوا من اموالھم (النساء:187)

“کیوں کہ اللہ تعالی نے ایک کو دوسرے پر فضیلت بخشی ہے اور اس لیے مردوں نے عورتوں پر اپنے مال خرچ کیے ہیں‘‘

اس کے ساتھ اللہ تعالی نے شوہر اور بیوی کو ایک دوسرے کے لیے لازم اور ملزوم قرار دیاہے تاکہ ازدواجی زندگی میں دونوں کی یکساں اہمیت اور ضرورت برقراررہے ۔

ارشادِ ربانی ہے:

ھن لباس لکم وانتم لباس لھن (البقرة:187)

“عورتیں تمہارے لیے لباس ہیں اور تم عورتوں کے لیے لباس ہو”

اس طرح سے کہا جا سکتا ہے کہ میاں بیوی ایک گاڑی کے دو پہیے ہیں اور دونوں کی اہمیت اپنی اپنی جگہ مسلم ہے ۔ دونوں ایک دوسرے کو حقوق کے معاملے میں جواب دہ ہیں جیسا کہ اللہ تعالی کا ارشاد ہے:

ولھن مثل الذی علیھن بالمعروف(البقرة:228)

“عورتوں کا مردوں پر اتنا ہی حق ہے جتنا کہ مردوں کا ان پر ہے”

خاندان کی اہمیت

اللہ تعالی کی نعمتوں میں سے ایک نعمت خاندان کا ہوناہے ۔یہ انسان کے لیے لطف و محبت ،شناخت اور پشت پناہی کا ذریعہ بھی ہے ۔سورة ہود میں ہے کہ حضرت شعیبؑ کی قوم نے ان کو مخاطب کر کے کہا:

ولو لارھطک لرجمنٰک وما انت علینا بعزیز۔ قال یا قوم ارھطی اعز علیکم من اللہ و اتخذ تموہ ورآءکم ظھر یا ان ربی بما تعملون محیط (الھود:91،92)

“اور اگر تیرے قبیلے کا خیال نہ ہوتا تو تجھے سنگسار کر دیتے اور ہم تجھے کوئی حیثیت والی ہستی نہیںگنتے۔انھوںنے جواب دیاکہ اے میری قوم کے لوگو!کیا تمہارے نزدیک میرے قبیلے کے لوگ اللہ سے بھی زیادہ ذی عزت ہیں کہ تم نے اسے پسِ پشت ڈال دیا ہے ، یقیناً میرا رب جو کچھ تم کر رہے ہو سب کو گھیرے ہوئے ہے”

حضرت شعیبؑ کی پشت پر ان کا خاندان موجود تھا،اس لیے کافروں کو انھیں نقصان پہنچانے کی ہمت نہ ہو سکی۔

اسی طرح حضرت محمدﷺ کی مکی زندگی میں شعبِ ابی طالب میں آپ کے ساتھ آپ کا پورا خاندان موجود تھا اگرچہ یہ لوگ ایمان نہیں لائے تھے مگر انھوں نے آپ کا ساتھ چھوڑنا گوارا نہیں کیا
(سیرتِ ابن ِہشام:1/122)

ہجرت کے موقع پر کفارِ قریش آپ کو( نعوذباللہ) قتل کے لیے پچاس بار سوچنے پر مجبور ہوئے کہ کہیں بنو ہاشم ہم پر چڑھ نہ دوڑیں۔پھر ان لوگوں نے تمام قبائل میں سے ایک ایک فرد کو لیا تاکہ آپ کے قبیلے والے قصاص نہ لے سکیں اگرچہ وہ اپنے ناپاک مقصد میں کامیاب نہ ہو سکے ۔

ان مثالوں سے ہم خاندان کی اہمیت کا بخوبی اندازہ لگا سکتے ہیں۔

خاندان نکاح کے ذریعے وجود میں آتاہے۔اس کو مستحکم اور پائیدار بنانے کے لیے شریعت نے کچھ اصول و قواعد بتائے ہیں اور خاندان کے ہر فرد کے لیے کچھ حقوق متعین کیے ہیںچنانچہ والدین،میاں بیوی،اولاداور دوسرے رشتے داروں کے حدود اور حقوق قرآن و حدیث میں واضح طور سے بیان کر دیے گئے ہیں۔ایک خاندانی نظام کیسا ہونا چاہیے،اس کا نمونہ خود آپ نے لوگوں کے سامنے پیش کیا۔آپ نے اپنی تمام ازواجِ مطہرات کو الگ الگ مکان رہنے کے لیے دیا۔حتی کہ کچن کے معاملات کو بھی علیحدہ رکھا جب کہ اگرسب کا کھانا ایک جگہ بنتا تو جدا جداکھانا پکنے کی بہ نسبت کم خرچ آتا۔اس کے باوجود آپ نے سب کے قیام و طعام کا نظام الگ رکھا تا کہ امہات المومنین کے درمیان سوکن والی فطری چپقلش نہ پیدا ہونے پائے۔آپ نے اس سلسلے میں اس قدر احتیاط کی کہ اگر کسی کاسامان ضائع ہو جاتا تو آپ اس کا متبادل اس کو دیتے تھے جیسا کہ درج ذیل حدیث سے پتا چلتا ہے :

عن انسؓ قال:کان النبی عند بعض نسائہ فارسلت احدیٰ امھات المومنین بصحفة فیھا طعام فضربت التی النبی فی بیتھا ید الخادم فسقطت الصحفة فانفلقت فجمع النبی خلق الصحفة ثم جعل یجمع فیھا الطعام الذی کان فی الصحفة و یقول غارت امکم ثم حبس الخادم حتی اتی بصحفة من عند التی ھو فی بیتھا فدفع الصحفة الصحیحة الی التی کسرت صحفتھا و امسک المکسورة فی البیت التی کسرت (بخاری:5225)

“حضرت انسؓ سے مروی ہے کہ نبیِ کریم ﷺ اپنی ایک زوجہ(حضرت عائشہؓ) کے یہاں تشریف رکھتے تھے۔اس وقت ایک دوسری زوجہ(حضرت زینبؓ) نے آپ کے لیے ایک پیالے میں کچھ کھانے کی چیز بھیجی۔ جن کے گھر میں آپ اس وقت تشریف فرما تھے انہوں نے خادم کے ہاتھ پر(غصہ میں)مارا جس کی وجہ سے کٹورا گر کر ٹوٹ گیا۔آپ نے اس کے ٹکڑے جمع کیے اور جو کھانا اس برتن میں تھا اسے بھی جمع کرنے لگے اور (خادم سے) فرمایا کہ تمہاری ماں کو غیرت آگئی ہے۔اس کے بعد خادم کو روکے رکھا۔آخر جن کے گھر میں وہ کٹورا ٹوٹا تھا ان کی طرف سے نیا کٹورا منگایا گیااور آپ نے وہ نیا کٹورا ان زوجہ مطہرہ کو واپس کیا جن کا کٹورا توڑ دیا گیا تھا اور ٹوٹا ہوا کٹورا ان کے یہاں رکھ لیا جن کے گھر میں وہ ٹوٹا تھا‘‘ 
آپ نے تمام ازواجِ مطہرات کا نفقہ بھی الگ الگ متعین کر دیا تھا۔جیسا کہ اس حدیث سے معلوم ہوتا ہے :

عن عمر بن الخطاب قال ان النبی ﷺ کان یبیع نخل بنالنضیر و یحبس لاھلہ قوت سنتھم (صحیح بخاری:5357)
"حضرت عمرؓ سے مروی ہے کہ نبی ﷺ بنی نضیر کے باغ کی کھجوریں بیچ کر اپنے گھر والوں کے لیے سال بھر کی روزی جمع کر دیا کرتے تھے‘‘

پھر جب مسلمانوں نے خیبر فتح کیا اور خوش حالی آئی تو ازدواج کے لیے 80 وسق کھجور اور 20 وسق جو سالانہ مقرر کیا گیا۔حدیثِ نبوی ہے:

عن عبد اللہ بن عمر ان النبی عامل اھل خیبر بشرط ما یخرج من زرع او ثمر و کان یعطی زواجہ مائة وسق ثمانون وسق تمر و عشرون وسق شعیر و قسم عمر فخیر ازواج النبی ان یقطع لھن من الماءو الارض او یمضی لھن فمنھن من اختار الارض و منھن من اختار الوسق و کانت عائشة اختارت الارض (صحیح بخاری: 2328)

“عبد اللہ بن عمر ؓ سے مروی ہے کہ رسول اللہﷺ نے(خیبر کے یہودیوں سے) وہاں(کی زمین میں)پھل کھیتی اور جو بھی پیداوار ہو اس کے آدھے حصہ پر معاملہ کیا تھا۔آپ اس میں سے اپنی بیویوں کو 100وسق دیتے تھے ۔ جس میں 80 وسق کھجور ہوتی اور 20 وسق جو۔پھر حضرت عمر ؓ نے (اپنے عہدِ خلافت میں) جب خیبر کی زمین کی تقسیم کی تو ازواجِ مطہرات کو اس بات کا اختیار دیا کہ اگر وہ چاہیں تو انہیں بھی وہاں کا پانی اور قطعہ زمین دے دیا جائے یا وہی پہلی صورت باقی رکھی جائے۔چنانچہ بعض نے زمین لینا پسند کیا او ربعض نے پیداوارلینا پسند کیا۔ حضرت عائشہؓ نے زمین ہی لینا پسند کیا تھا”

حضرت فاطمہؓ آپ کی سب سے چہیتی بیٹی تھیں ان کی شادی آپ نے حضرت علیؓ سے کی جو آپ کو بہت عزیز تھے ،اس کے باوجود شادی کے بعدان کو الگ مکان دیا۔حضرت علیؓ کی شادی کے وقت ان کی مالی حالت تنگ تھی اس لیے حضرت حارثہؓ بن نعمان انصاری نے اپنا گھر آپ کو ہدیہ کے طور پر پیش کیا کہ آپ اور حضرت فاطمہؓ اس گھر میں رہیں ۔

اس سے معلوم ہوتا ہے کہ اس وقت شادی کے لیے لڑکوں کے پاس ذاتی گھر کا ہونا ضروری تھا۔ہمارے یہاں زیادہ تر مردوں اور عورتوں کی احکامِ شریعت سے غفلت کا نتیجہ یہ ہے کہ شادی کے وقت لڑکے لڑکی کی صلاحیت کے بجائے پوری توجہ ان کے والدین کی ’ صلاحیتوں ‘ پر مرکوز ہوتی ہے کہ لڑکی کے والدین کتنا جہیز دے سکتے ہیں اور لڑکے کے والدین ہماری بیٹی کو کتنے بڑے گھر میں رکھ سکتے ہیں۔ان سب کے بجائے اس پر توجہ دی جائے کہ لڑکے لڑکیوں کو شروع ہی سے اپنی ذمہ داریوں کا احساس ہو اور خاص کرلڑکوں کوپتا ہو کہ ہمیں شادی سے پہلے اپنے پیروں پر کھڑا ہو جانا ہے اور والدین کی بیساکھی کے ذریعہ شادی نہیں کرنی ہے تو وہ یقینا کچھ نہ کچھ محنت کر کے بننا چاہیں گے۔

اگر صحابہ کرام کے طور طریقوں پر نظر ڈالی جائے تو ہم دیکھتے ہیں کہ ان کی اکثریت مشترکہ خاندانی نظام کے بجائے جداگانہ نظام کے تحت رہا کرتی تھی۔قرآن کریم کی یہ آیتِ کریمہ اسی طرف اشارہ کرتی ہے:

لیس علی الاعمیٰ حرج و لا علی الاعرج حرج ولا علی المریض حرج و لا علی انفسکم ان تاکلوا من بیوتکم او بیوت اٰبآءکم او بیوت امھٰتکم او بیوت اخوانکم او بیوت اخوٰتکم او بیوت اعمامکم او بیوت عمٰتکم او بیوت اخوالکم او بیوت خٰلٰتکم او ما ملکتم مفاتحہ او صدیقکم لیس علیکم جناح ان تاکلوا جمیعا او اشتاتا فاذا دخلتم بیوتا فسلموا علی انفسکم تحیة من عند اللہ مبٰرکة طیبة کذالک یبین اللہ لکم الاٰیٰت لعلکم تعقلون (النور:61)

 ’ ’اندھے پر،لنگڑے پر،بیمار پر اور خود تم پر کوئی حرج نہیں کہ تم اپنے گھروں سے کھا لو یا اپنے باپوں کے گھروں سے یا اپنی ماوﺅں کے گھروں سے یا اپنے بھائیوں کے گھروں سے یا اپنی بہنوں کے گھروں سے یا اپنے چچاﺅں کے گھروں سے یا اپنی پھوپھیوں کے گھروں سے یا اپنی خالاﺅں کے گھروں سے یا ان گھروں سے جن کی کنجیوں کے مالک ہو یا اپنے دوستوں کے گھروں سے۔ تم پر اس میں بھی کوئی گناہ نہیں کہ تم سب ساتھ بیٹھ کر کھاﺅ یا الگ الگ۔پس جب تم گھروں میں جانے لگو تو اپنے گھر والوں کو سلام کر لیا کرو دعائے خیر ہے جو با برکت اور پاکیزہ ہے اللہ تعالی کی طرف سے نازل شدہ،یوں ہی اللہ تعالی کھول کھول کر تم سے احکام بیان فرما رہا ہے تاکہ تم سمجھ لو”

اس سے معلوم ہوتا ہے کہ اس زمانے میں والدین ، اولاد اور دوسرے رشتہ دار الگ الگ گھروں میں رہا کرتے تھے۔حضرت عبدالرحمان بن ابوبکرؓ کے بارے میں آتا ہے کہ آپ حضرت ابوبکرؓ کے ساتھ نہیں رہا کرتے تھے لیکن اس کے باوجود والدین کی خدمت کا پورا خیال رکھتے تھے اور اس سلسلے میں ان کی ناراضی بھی برداشت کیا کرتے تھے۔

عہدِ حاضر میں مشترکہ خاندانی نظام کو بہتر تسلیم کیا جاتا ہے ۔ خصوصا برِ صغیر میں الگ الگ گھروں میں رہنے کو مغربی تہذیب کے مشابہ قرار دیا جاتاہے۔مگر کیاواقعی یہ نظام صحیح ہے؟ اسلام اس کے بارے میں کیا تعلیم دیتا ہے اور اس میں کیا فوائد و نقصانات ہیں ؟ اس پر عموما توجہ نہیں دی جاتی ہے۔

اگر تاریخ کا مطالعہ کیا جائے تو یہ بات واضح ہوجائے گی کہ مشترکہ خاندانی نظام کا تصور ہمارے یہاں ہندوﺅں کی دیکھا دیکھی آیا ہے۔ان کے یہاں پردے وغیرہ کا کوئی تصور نہیں ہوا کرتا ہے بلکہ ایک عرصے تک ایک بھائی کی بیوی کو سب بھائیوں کی مشترکہ بیوی سمجھنا،سالی کو آدھی گھر والی کہنا اور دیور بھابھی میں خطرناک حد تک چھیڑ چھاڑاور ہنسی مذاق اس سماج کا حصہ تھا۔بدقسمتی سے ثانی الذکر کو مسلمانوں نے بھی “ سب چلتا ہے” کے اصول پر اپنا لیا ہے،جو کہ کسی حالت میں جائز نہیں ہے۔

مشترکہ خاندانی نظام سے مراد وہ گھر ہے جہاں ساس ،سسر ،بیٹے ،بیٹیاں اور بہویں وغیرہ ایک ساتھ رہتے ہوں۔ممکن ہے بعض لوگوں کو مشترکہ خاندانی نظام میں بہت سے فوائد نظر آئیں جیسے آپسی تعاون کا فروغ، خاندانی رشتوں کی پاسداری ، بزرگوں سے بچوں کا استفادہ اور تربیت ہونا ، لوگوں کا دکھ سکھ کے موقع پر کام آنا وغیرہ۔مگر اسلام میں کسی چیز کے بارے میں ا س کی اچھائی یا برائی کی بنیاد پر فیصلہ نہیں کیا جاتا ہے بلکہ اس کے صحیح یا غلط ہونے کی بنیاد پر فیصلہ ہوتا ہے ۔ ورنہ شراب میں بھی کچھ نہ کچھ فوائد ہیں مگر اس سے شراب حلال نہیں ہو جائے گی۔کیوں کہ مجموعی طور پر اس کے نقصانات زیادہ اور فوائد کم ہیں۔

مشترکہ خاندانی نظام اسلامی اصولوں کے خلاف ہے ۔اس کی وجہ سے جن مسائل کا سامنا مسلم معاشرے کو کرنا پڑ رہا ہے ان میں سے چند درج ذیل ہیں جس کے نہایت برے اثرات واضح طور پر نظر آ رہے ہیں۔

(1) بے پردگی اور نامحرم سے اختلاط

اسلام نے انسانی زندگی کے ہر پہلو میں رہنمائی کی ہے۔ان میں سے ایک پردہ اور نامحرم سے اختلاط کو روکنا بھی ہے۔اللہ تعالی کا ارشاد ہے:

و قل للمومنٰت یغضضن من ابصرھن و یحفظن فروجھن ولا یبدین زینتھن الا ما ظھر منھا و لیضربن بخمرھن علی جیوبھن ولا یبدین زینتھن الا لبعولتھن او اٰبآئھن او اٰبآءبعولتھن اوابنآئھن اوابنآءبعولتھن او اخوانھن او بنی اخوٰتھن او نسآئھن او ما ملکت ایمانھن اوالتٰبعین غیر اولی الاربة من الرجال او الطفل الذین لم یظھروا علی عورٰت النسآءولا یضربن بارجلھن لیعلم ما یخفین من زینتھن و توبوا الی اللہ جمیعا ایہ المومنون لعلکم تفلحون(النور:31)

“اور اے نبی،مومن عورتوں سے کہہ دوکہ اپنی نظر بچا کر رکھیں،اور اپنی شرمگاہوں کی حفاظت کریں،اور اپنا بناﺅ سنگھار نہ ظاہر کریں بجز اس کے جو خود ظاہر ہو جائے،او راپنے سینوں پر اپنی اوڑھنیوں کے آنچل ڈالے رہیں۔وہ اپنا بناﺅ سنگھار نہ ظاہر کریں مگر ان لوگوں کے سامنے:

شوہر،باپ،شوہروں کے باپ،اپنے بیٹے،شوہروں کے بیٹے،بھائی،بھائیوں کے بیٹے،اپنے میل جول کی عورتیں،اپنی لونڈی،غلام،وہ زیرِدست مردجو کسی اور قسم کی غرض نہ رکھتے ہوں،اور وہ بچے جو عورتوں کی پوشیدہ باتوں سے ابھی واقف نہ ہوئے ہوں۔وہ اپنے پاﺅں زمین پر مارتی ہوئی نہ چلا کریں کہ اپنی جو زینت انھوں نے چھپا رکھی ہو اس کا لوگوں کو علم ہو جائے۔ائے مومنو،تم سب مل کر اللہ سے توبہ کرو،توقع ہے کہ فلاح پاﺅ گے”

یہ احکام صرف عورتوں کے لیے نہیں بیان ہوئے ہیں بلکہ مردوں کے لیے بھی ہیں مثلا نگاہیں نیچی رکھنے اور شرمگاہوں کی حفاظت کرنے میں دونوں سے خطاب کیا گیا ہے۔مگر اب جب بھی بات پردے کی ہوتی ہے تو اس سے مراد صرف عورتوں کا پردہ لیا جاتا ہے اورمرد حضرات کچھ بھی کرتے پھریں،اس پر توجہ نہیں دی جاتی ہے۔

قرآن میں اگر عورتوں کا خصوصی ذکر کیا گیا ہے تو اس وجہ سے کہ عورتوں کی حفاظت اسلام کا بنیادی نظریہ رہا ہے اور یہ کہ اللہ تعالی نے عورتوں کو زیادہ پر کشش بنایا ہے پھر ان کی شخصیت کو باوقار بنانے کے لیے پردے کے احکام دیے گئے ہیں ۔ارشادِ ربانی ہے:

یاایھا النبی قل لازواجک و بناتک و نسآءالمومنین یدنین علیھن من جلابیبھن ذٰلک ادنیٰ ان یعرفن فلا یوذین(الاحزاب:59)

“اے نبی! اپنی بیویوں،بیٹیوںاور مومنوںکی عورتوں سے کہہ دو کہ اپنے اوپر چادر ڈال لیا کریں۔یہ زیادہ مناسب طریقہ ہے تاکہ وہ پہچان لی جائیں اور انہیں پریشان نہ کیا جا سکے”

اسی وجہ سے عورتوں کو اپنی آواز میں بھی سختی رکھنے کا حکم دیا گیا جیسا کہ قرآن کہتا ہے:

یٰنسآءالنبی لستن کاحد من النسآءان اتقیتن فلا تخضعن بالقول فیطمع الذی فی قلبہ مرض و قلن قولا معروفا(الاحزاب:32)

“نبیﷺ کی بیویو! تم عام عورتوں کی طرح نہیں ہو۔ اگر تم اللہ سے ڈرنے والی ہو تو دبی زبان سے بات نہ کیا کرو کہ دل کی خرابی کا مبتلا کوئی شخص لالچ میں پڑ جائے،بلکہ صاف سیدھی بات کرو”

بد قسمتی سے ہمارے یہاں پردے کا تصور عورتوں اور لڑکیوں کو تعلیم اور نوکری سے روکنا ، زبردستی شادی کرانا اور اجنبیوں سے پردہ کرانے تک محدود ہے۔نامحرم قریبی رشتے داروں،دیور ،جیٹھ ، کزنس،اور دوستوں وغیرہ سے پردہ کرنا معیوب سمجھا جاتا ہے۔

مشترکہ خاندانی نظام میں اس طرح کے رشتہ دار عموما ساتھ رہا کرتے ہیں۔ایک لڑکے کا پورا خاندان اس کے لیے تو محرم ہے لیکن اس کی بیوی کے لئے شوہر کے خاندان کے زیادہ تر لوگ نامحرم ہیں،اب اگر وہ سارے وقت پردے میں رہے تو خود اس کو مشکل ہو گی اور سسرال والے بھی ناراض ہو جائیں گے کہ’ دلہن‘ نامعقول لگتی ہےگھلتی ملتی نہیں ہےمغرور ہے یاملانی ہے وغیرہ وغیرہ۔اس لیے کسی انسان کو حق نہیں کہ بیوی کو ایسے گھر میں رہنے پر مجبور کرے جہاں غیر محرم رہتے ہوں چاہے وہ اس کے کزنس یا بھتیجے بھانجے ہی کیوں نہ ہوں۔حدیث ِ نبوی ہے:

عن عقبہ بن عامر ان رسول اللہ ﷺقال: ایاکموالدخولعلیالنساء۔فقالرجلمنالانصاریارسول اللہ !افرایت الحمو؟ قال : الحمو الموت(صحیح بخاری:5232)

“رسول ﷺ نے فرمایا!اجنبی عورتوں کے پاس جانے سے بچو،ایک انصاری نے عرض کیا:یا رسول اللہ حمو کے بارے میں آپ کا کیا حکم ہے؟آپ نے فرمایا کہ حمو تو موت ہے”

حمو سے مراد شوہر کے وہ عزیز و اقارب ہیں جن سے عورت کا نکاح ہو سکتا ہے۔شوہر کے رشتے داروں سے خلوت نشینی،اجنبیوں کے ساتھ خلوت میں رہنے سے کہیں زیادہ خطر ناک ہے اور اسی وجہ سے مشترکہ خاندانی نظام میں اس کا خطرہ بڑھ جاتا ہے۔ویسے بھی گھروں میں سترِ عورت سے زیادہ حجاب کا مسئلہ ہوتا ہے۔اسی وجہ سے آپ نے اس پر اتنی تاکید کی ہے جیسا کہ اس حدیثِ نبوی سے معلوم ہوتا ہے آپ نے فرمایا :

لا تلجوا علی المغیبات ، فان الشیطان یجری من احدکم مجری الدم (الجامع للترمذی مع التحفة:1/1188)

“جن عورتوں کے شوہر گھر پر موجود نہ ہوں،ان کے یہاں مت جاﺅ کیوں کہ شیطان تمہارے اندر خون کی طرح رواں رہتا ہے”

(2)پرائیویسی کا خاتمہ

مشترکہ خاندانی نظام میں پرائیویسی کے ان اصولوں کو اپنانا بہت ہی مشکل ہوتا ہے جس کی قرآن و حدیث میں تعلیم دی گئی ہے ۔ارشادِ ربانی ہے:

یٰا ایھا الذین اٰمنوا لیستاذنکم الذین ملکت ایمانکم و الذین لم یبلغوا الحلم منکم ثلٰث مرٰت من قبل صلٰوة الفجر و حین تضعون ثیابکم من الظھیرة و من بعد صلٰوة العشآءثلٰث عورٰت لکم لیس علیکم و لا علیھم جناح بعدھن طوٰفون علیکم بعضکم علی بعض کذلک یبین اللہ لکم الاٰیٰت و اللہ علیم حکیم(النور:58)

“اے ایمان والو!تمہارے غلام اور وہ لڑکے جو حدِ بلوغ کو نہیں پہنچے ہوں،تین وقت میں تم سے (تخلیہ میں آنے کی) اجازت حاصل کر لیں۔ایک نمازِ فجر سے پہلے ، دوسرے ظہر کے وقت جب تم آرام کے لئے کپڑے اتار لیتے ہو اور عشاءکے بعد،تین وقت تمہارے پردے کے ہیں۔ان کے علاوہ نہ تم پر کوئی الزام ہے نہ ہی ان پرتم سب آپس میں ایک دوسرے کے پاس بکثرت آنے جانے والے ہو،اللہ اس طرح کھول کھول کر اپنے احکام تم سے بیان فرما رہا ہے۔اللہ تعالی پورے علم اور کامل حکمت والا ہے‘‘

جب کہ مشترکہ خاندانی نظام میں صورتِ حال عموما یہ ہوتی ہے کہ ایک ہی کمرے میں میاں بیوی،بچے اور بسا اوقات دوسرے لوگ بھی رہتے اورسوتے ہیں۔جس کے نتیجے میں کتنے مسائل کھڑے ہوتے ہیں اس کا اندازہ بخوبی لگایا جا سکتا ہے۔اس میں شوہر اور بیوی کو زیادہ ملنے کا بھی موقع نہیں ملتا،خاص کر نوجوان جوڑوں میں شروعاتی دور میں اس کا غلبہ رہتا ہے لیکن انھیں اس کے مواقع میسر نہیں ہوتے ،چنانچہ اس کے برے نتائج مرتب ہوتے ہیں۔ آپ کا ارشاد ہے:

اذا دعا الرجل زوجتہ لحاجتہ فلتاتہ و ان کانت علی التنور(جامع الترمذی :1182)

“جب کوئی شخص اپنی بیوی کوضرورت پوری کرنے کے لیے بلائے تو وہ فورا آجائے،اگرچہ وہ تنور پر بیٹھی ہوئی ہو‘‘

ایک دوسری حدیث ہے :

عن جابر ؓان رسول اللہﷺرای امراة فاتی امرتہ زینب و ھی تمعس منیئة لھا فقضی حاجتہ ثم خرج الی اصحابہ فقال ان المراة تقبل فی صورة شیطان و تدبر فی صورة شیطان فاذا ابصر احدکم امراة فلیات اھلہ فان ذلک یرد ما فی نفسہ(صحیح مسلم:3407)

“حضرت جابر ؓبن عبد اللہ سے روایت ہے کہ آپ نے کسی عورت کو دیکھا تو آپ اپنی بیوی حضرت زینب ؓ کے پاس آئے۔اس وقت وہ چمڑے کو دباغت دینے میں مصروف تھیں،آپ نے انھیں بلایا اور ان سے اپنی ضرورت پوری کی ۔پھر صحابہ کرام کے پاس آئے اور فرمایا!عورت شیطان کی صورت میں آتی جاتی ہے،اس لیے اگر تم میں سے کسی کی نظر دوسری عورت پر پڑ جائے تو وہ اپنی بیوی سے اپنی ضرورت پوری کر لے کہ یہ چیز اس کی پریشان خیالی کو ختم کرے گی”

اس کے ساتھ اس طرح کے گھروں میں شرم و حیاکی وجہ سے نمازیں قضا ہو جایا کرتی ہیں۔لیکن اگر الگ گھر یا کمرے ہوں تو ان تمام مسائل سے بچا جا سکتا ہے۔اسی وجہ سے شریعت نے بیوی کو یہ حق دیا ہے کہ وہ الگ رہائش کا مطالبہ کر سکتی ہے ۔ارشادِ ربانی ہے:

و اسکنوھن من حیث سکنتم من وجدکم و لا تضاروھن لتضیقواعلیھن (الطلاق:6)

“اور عورتوں کو رہائش فراہم کرو جو تمہاری حیثیت کے مطابق ہو اور ان کو تکلیف نہ پہنچاﺅ کہ وہ تنگ آجائیں”

مفسرین اور فقہائے کرام نے اس سے مراد صرف ایک کمرے کی چھت کو نہیں لیا ہے بلکہ اس سے مراد ایک الگ گھر ہے جس میں عورت آزادی سے رہ سکے اور اپنی نجی زندگی گزار سکے۔اس سلسلے میں علامہ کاسانیؒ فرماتے ہیں:

ولو اراد الزوج ان یسکنھا مع ضرتھا او مع احمائھا کام الزوج و اختہ و بنتہ من غیرھا و اقاربہ فابت ذلک علیہ ان یسکنھا فی منزل مفرد لانھن ربما یوذینھا و یضررن بھا فی المساکنة و ابائھا دلیل الاذیٰ و الضرر و لانہ یحتاج الی ان یجامعھا و یعاشرھا فی ای وقت یتفق ، و لا یمکنہ ذلک اذا کان معھما ثالث حتیٰ لو کان فی الدار بیوت ففرغ لھا بیتاً و جعل لبیتھا غلقاً علی حدة قالوا انھا لیس لھا ان تطالبہ ببیت آخر(بدائع الصنائع :کتاب النفقة:3/428،429)

“اگر شوہر اپنی بیوی کو اس کی سوکن،دیوروں،شوہر کی ماں،بہن،لڑکی یا دیگر رشتہ داروں کے ساتھ رکھنا چاہے او ر عورت اس کے لیے آمادہ نہ ہو تو شوہر پر لازم ہے کہ اس کو جدا گانہ مکان میں رہائش دے،اس لیے کہ ایک ساتھ رہنے سے ایک دوسرے کو تکلیف ہو سکتی ہے،چنانچہ انکار کرنا اس کی علامت ہے،نیز عورت کو اپنے شوہر کے ساتھ کسی بھی وقت تنہائی کی ضرورت ہے اور تیسرے کی موجودگی میں یہ ممکن نہیں،البتہ ایک بڑے گھر میں کئی کمرے ہوں اور شوہر ان میں سے ایک کمرہ اپنی بیوی کے لیے خاص کر دے اور اس کے لئے تالا چابی الگ کر دے تو فقہا نے کہا ہے کہ پھر اسے مزید کسی کمرہ یا مکان کے مطالبہ کا حق نہیں رہ جائے گا”

لیکن بعض فقہاءنے ساتھ میں کچن،باتھ روم وغیرہ کا بھی الگ ہونا ضروری قرار دیا ہے۔

(3)باہمی سوچ کا مختلف ہونا

اللہ تعالی نے انسانوں کو ایک دوسرے سے مختلف بنایا ہے اور سب کو الگ الگ مقاصد اور صلاحیتوں سے نوازا ہے۔ اللہ تعالی کا ارشاد ہے:

و ھو الذی جعلکم خلٰئف الارض و رفع بعضکم فوق بعض درجات لیبلوکم فی ما اٰتاکم ان ربک سریع العقاب و انہ لغفور رحیم(الانعام:166)

“اللہ تعالی ہی نے تم کو زمین کا خلیفہ بنایا اور باہم فرق مراتب رکھا تا کہ تم کو عطا کردہ چیز کے بارے میں آزمایے،بے شک تیرا پروردگار جلد عذاب دینے والا ہے اور وہ یقیناً بخشنے والا اور مہربان بھی ہے”

پھرمشترکہ خاندانی نظام میں یہ کیسے ممکن ہے کہ سب کا مقصد اور سب کی پسند ایک ہو ؟ہر ایک اپنی مرضی اور خواہش کے مطابق کھانا پینا ،اٹھنا بیٹھنا چاہتا ہے اور یہ اس کا بنیادی حق ہے ۔اب اگر اس کو اپنا بنیادی حق ہی نہ ملے تو گھر میں سکون اور خوشی کیسے میسر ہوسکتی ہے؟ایک گھر میں بیس پچیس افراد ہوں اور کئی بہویں مل کرساس کی نگرانی میں کھانا پکاتی،صفائی کرتی ہوںاور کیا مجال کہ بیٹا یا بہو منہ کھول سکے تو اس کا نتیجہ عموما یہ ہو تا ہے کہ دلوں میں کینہ و بغض بھرا ہوتا ہے اور ایک دوسرے پر اعتراضات،لعن طعن،تنقیدیں کی جاتی ہیں۔اس طرح گھر کا سکون درہم برہم ہوجاتا ہے۔

مشترکہ خاندانی نظام میں عموماسارے فیصلے بڑے بھائی کرتے ہیں۔کاروباری معاملات میں فیصلہ کریں تو کریں مگرگھر کے دوسرے میاں بیوی کے ذاتی معاملات میں بڑے بھائی کہاں سے ٹپک پڑے؟اس سے ان کے حقوق کی حق تلفی ہوتی ہے اور رشتوں میں دراڑ آتی ہے۔

(4)گھریلو کام کاج کا مسئلہ

ہمارے یہاں ایک بڑے طبقہ میں لڑکوں کی شادی ہی اس غرض سے کی جاتی ہے کہ کوئی گھر چلانے والی آجائے جوسب کی خدمت کرے،ساس سسر کا دھیان رکھے۔اب اگر بہو تعلیم حاصل کرناچاہے یا کوئی کتاب ہی پڑھنے لگے تو گھر میں طوفان برپا ہو جاتا ہے ۔آج کا دور کمپیوٹر،انٹرنیٹ کا دور ہے۔گھر کے تمام افرادکمپیوٹر چلا سکتے ہیں،حتی کہ بچے بچیاں اس پر گیم کھیل سکتے ہیں مگر بہو صرف کمپیوٹر’ صاف‘ کرنے کے لیے ہوتی ہے۔

بہوپر ساس سسر کی خدمت کے لیے زور دیا جاتا ہے ۔ مگر خدمت و اطاعت کا حکم ماں باپ اور شوہر کے لئے ہے نہ کہ ساس سسر کے لیے۔ان کی خدمت بیٹوں کی ذمہ داری ہے۔ مگر انھیں بہوﺅں سے ہی خدمت کرانے کا شوق ہوتا ہے ۔یہ تو تب ہی ممکن ہوگا جب ساس سسر بہو کو بیٹی کا درجہ دیں اور کسی خدمت کی توقع نہ کریں۔کیوں کہ اولاد سے تو کوئی زیادتی نہیں کرتا ہے اور نہ ہی امید رکھتا ہے کہ بیٹے، بیٹیاں خدمت کے لیے ایک ٹانگ پر کھڑے رہیں۔جب بہو کو بیٹی کا درجہ ملے گا تو وہ بھی بے لوث محبت کے ساتھ ساس سسر کو والدین کا درجہ دے گی ا ور خوشی خوشی خدمت کرے گی۔

بہت سے نیک لوگ بھی اپنی بیوی کو ماں کے رحم و کرم پر چھوڑ دیتے ہیں۔ ارے بھائی!آپ شوہر ہو تو خود معاملات دیکھو۔خود ایک طرف ہو کر بچی کو ایک عورت کے سپرد کر دینا ،یہ کیا بات ہوئی؟؟پھر ساس کو بھی حکومت کرنے میں مزا آتا ہے اور چھوٹی چھوٹی باتوں کا بتنگڑبنا لیتی ہیں۔اپنی بیٹی وہی غلطی کرے تو نظر انداز کر جاتی ہیں اور بہو نے اس سے کم درجہ کی ہی غلطی کر دی تو شہر بھر کا موضوعِ گفتگو بنا دیتی ہیں۔جس سے ساس بہو میں سرد جنگ چھڑ جاتی ہے اور گھر کا ماحول خراب ہوجاتا ہے۔

مشترکہ خاندانی نظام میں ایک مسئلہ یہ بھی ہوتاہے کہ نندوںکا مہینے میں ہفتہ ڈیڑھ ہفتہ میکے میں گزرتا ہے اوربھابھی پر اپناپورا حق بلکہ حکم چلایایا جاتاہے حتی کہ اپنے بچوں کی بھی خدمت کرائی جاتی ہے مگر اپنے فرائض و حقوق سے مکمل طور پر آنکھیں موند لی جاتی  ہیں۔اس سے آپسی تعلقات خراب ہوتے ہیں اور دشمنیاں پیدا ہوتی ہیں۔اسی وجہ سے کہا جاتا ہے کہ بہت زیادہ قربت دلوں میں دراڑیں پیدا کرتی ہے ۔عربی کا ایک مقولہ ہے:

تعاملوا کالاجانب و تعاشروا کالاخوان

“آپس میں معاملات اجنبیوں کی طرح کرو اور رہن سہن بھائیوں کی طرح رکھو”

(5)خاندان کا ایک ذات پر منحصر رہنا

عموما مشترکہ خاندانی نظام میں ایک کمانے والا ہوتا ہے اور دس بیٹھ کر مفت کی روٹیاں توڑتے ہیں۔ان گھروں میں ایسے افراد ہوتے ہیں جو کام کر سکتے ہیں مگر کرنا نہیں چاہتے۔مغربی ترقی یافتہ ممالک میں اس کی مثال نہیں ملے گی۔ایسے خاندانوں میں ایک عجیب و غریب مفروضہ ہوتا ہے کہ کسی بے کار آدمی کی شادی کر دو تو وہ خود ہی ’سیٹ ‘ہو جائے گا لیکن اگر اس میں ناکامی ملی تو خاندان کے دوسرے لوگوں کو اس غلطی کا خمیازہ بھگتنا پڑتا ہے۔اسی وجہ سے کہا گیا ہے کہ مرد اگر بیوی کو روٹی ، کپڑا اور مکان مہیا نہ کر سکے تو اسے شادی نہیں کرنی چاہیے۔ ارشادِ ربانی ہے:

و لیستعفف الذین لا یجدون نکاحا حتی یغنیھم اللہ من فضلہ (النور:33)

“اور چاہیے کہ بچے رہیں (پاکدامن رہیں) وہ جو کہ نکاح (مقدور) نہیں پاتے یہاں تک کہ اللہ تعالی انھیں اپنے فضل سے غنی کر دیں”

ورنہ جب تک والد زندہ رہتے ہیں خرچ برداشت کرتے ہیں کیوں کہ ان کو بہر حال اولاد سے محبت ہوتی ہے پھر ان کے انتقال کے بعد بھائیوں میں بٹوارا ہو جاتا ہے اور لڑائی جھگڑے شروع ہو جاتے ہیں۔آپسی تعلقات ختم ہو جاتے ہیں کیوں کہ بڑا بھائی تمام افراد کا خرچ اٹھانا نہیں چاہتا اور گھر والوں سے الگ ہونے کی کوشش کرنے لگتا ہے۔

بعض دفعہ مالی تنگی کی وجہ سے لوگ خلیج ممالک کا رخ کرتے ہیں اور سالہا سال باہر رہتے ہیں،بیوی کو دیور یا قریبی رشتے داروں کے رحم و کرم پر چھوڑ جاتے ہیں جس سے غیر مسلوں تک سے تعلقات قائم ہو جاتے ہیںاورمعاشرے میں سنگین مسائل پیدا ہوتے ہیں پھر گھر ٹوٹ جاتے ہیں۔ آج کل اس طرح کی مثالیں کثیر تعداد میں نظر آتی ہیں۔اسی وجہ سے حضرت عمرؓ نے اپنی بیٹی حضرت حفصہؓ سے پوچھ کر چار مہینہ سے زائد کسی کو جہاد جیسے عظیم فریضے میں جانے سے روک دیا تھا۔

(6)فضول خرچی اور لاپروائی

مشترکہ خاندانی نظام میں لوگ ہر چیز کو پرائے کا مال سمجھ کر اسے بے دردی اور لاپرواہی سے استعمال کرتے ہیں۔اس سے روپے اور سامان کا ضیاع ہوتا ہے جس کو قرآن کریم نے فضول خرچی میں شمار کیا ہے۔ارشادِ ربانی ہے:

ولا تبذر تبذیراان المبذرین کانوا اخوان الشیاطین ۔وکان الشیطان لربہ کفورا(سورة بنی اسرائیل:27)

“فضول خرچی نہ کرو،فضول خرچی کرنے والے شیطان کے بھائی ہیں اور شیطان اپنے رب کا بڑا ہی نا شکرا ہے”

اگر وہی چیزیںاستعمال کرنے والوں کی اپنی ہوں تو سوچ سمجھ کے ضرورت کے مطابق استعمال کی جاتی ہیں۔اسی طرح اس نظام میں پانی،بجلی کے یا دوسرے مختلف طرح کے بل زیادہ آتے ہیں جس کا اثر نمایاں طور پر گھر کی ضرورتوں اور بچوں کی تعلیم پر پڑتا ہے ۔

بسا اوقات اس کی وجہ سے انسان لوگوں کا مقروض ہو جاتا ہے۔اسی وجہ سے قرآن نے مسلمانوں کو اعتدال اور میانہ روی اختیار کرنے کی تعلیم دی ہے تا کہ قرض لینے کی ضرورت پیش نہ آئے۔آپ قرض کو ناپسند کرتے تھے کیوں کہ یہ شب و روز کی پریشانی کا باعث بن جاتا ہے۔اوراس سے پناہ مانگا کرتے تھے:

اللھم انی اعوذبک من غلبة الدین و قھر الرجال(ابوداﺅد:1555)

“خدایا!میں تیری پناہ مانگتا ہوں قرض کے غلبہ اور آدمیوں کے قہر سے”

اورنماز میں اکثر آپ یہ دعا مانگا کرتے تھے:

اللھم انی اعوذبک من الماثم و المغرم فقیل لہ انک تستعیذ من المغرم کثیرا یا رسول اللہ؟ فقال ان الرجل اذا غرم حدث فکذب ووعد فاخلف(صحیح بخاری:823)

“خدایا! میں تیری پناہ مانگتا ہوں گناہ اور قرض سے۔کسی نے پوچھایا رسول اللہ کیا بات آپ اکثر قرض سے پناہ مانگتے ہیں؟فرمایا:آدمی جب مقروض ہو جاتا ہے تو اس کا حال یہ ہوجاتا ہے کہ جب بات کرتا ہے تو جھوٹ بولتا ہے اور وعدہ کرتا ہے تو اس کی خلاف ورزی کرتا ہے”

ان ہدایات کے پیشِ نظر انسان کو فضول خرچی سے اجتناب کرنا چاہیے تاکہ وہ کسی کا مقروض نہ ہو اور اگر شدید ضرورت کے تحت لینا ہی پڑ جائے تو ہمیشہ ادائیگی کی نیت رکھنی چاہیے۔حدیث میں ہے:

من ادان اموال الناس یرید اداءھا ادی اللہ عنہ و من اخذھا یرید اتلافھا اتلفہ اللہ(صحیح بخاری:2387)

’’جس نے لوگوں کا مال قرض کے طور پر لیا اور اس کو ادا کرنا چاہا تو اس کا قرض اللہ تعالی ادا فرمائے گا۔ اور جس نے تلف کرنے کے ارادے سے لیا تو اللہ تعالی اس کو تلف فرمائے گا”

(7)جائیداد اور ترکہ کی عدمِ تقسیم

مشترکہ خاندانی نظام میںایک خرابی یہ ہے کہ اس میں جائیداد یا ترکہ اور ذرائع آمدنی کی منصفانہ تقسیم نہیں ہوتی،بلکہ بسا اوقات تو تقسیم ہی نہیں ہوتی ہے پھر جب سالوں بعد تقسیم کا عمل ہوتا ہے تو ایک دوسرے سے بغض و عداوت،دشمنی،حسد،تہمت اور الزام تراشی کا نہ رکنے والا سلسلہ شروع ہو جاتا ہے اور ساری خیر سگالی،تعاون اور ایک دوسرے سے ہمدردی کے جذبہ کی ہوا نکل جاتی ہے۔اگر لوگ جداگانہ طرزِ رہائش شروع سے ہی اختیار کر لیں تو ان تمام مشکلات سے بچا جا سکتا ہے۔

اللہ تعالی نے میراث کا نظام اپنے علم و حکمت کی بنیاد پر نافذ کیا ہے۔اس سے تمام حق دار کو ان کا حق مل جاتا ہے۔اس کے ساتھ ساتھ اللہ تعالی نے لوگوں کو احکامِ الٰہی اور شریعت کی پابندی کرنے کا حکم دیا ہے۔جس نے اس کی اطاعت کی تو اس کے لیے جنت ہے اور جس نے اس کی نافرمانی کی اس کے لیے جہنم ہے۔

جیسا کہ وصیت کے سلسلے میں ارشادِ ربانی ہے :

تلک حدوداللہ ومن یطع اللہ و رسولہ یدخلہ جنت تجری من تحتھا الانھٰر خٰلدین فیھا وذلک الفوز العظیم۔ ومن یعص اللہ و رسولہ و یتعد حدودہ یدخلہ نارا خالدا فیھا و لہ عذاب مھین(النسآئ:14،13)

“یہ اللہ کی مقرر کی ہوئی حدیں ہیں۔جو اللہ اور اس کے رسول کی اطاعت کرے گا اسے اللہ ایسے باغوں میں داخل کرے گا جن کے نیچے نہریں بہتی ہوں گی اور ان باغوں میں وہ ہمیشہ رہے گا اور یہی بڑی کامیابی ہے۔اور جو اللہ اور اس کے رسول کی نافرمانی کرے گا اور اس کی مقرر کی ہوئی حدوں سے تجاوز کر جائے گا اسے اللہ آگ میں ڈالے گا جس میں وہ ہمیشہ رہے گا اور اس کے لیے رسوا کن عذاب ہے”

(8)بدگمانی کی کثرت

مشترکہ خاندانی نظام میں اکثر ساس بہو اور نند کے درمیان بدگمانی،غیبت اور تجسس وغیرہ کی فضا چھائی رہتی ہے اورہر آنے جانے والوں سے ایک دوسرے کی شکایت اور لگائی بجھائی کا کام ہوا کرتا ہے۔اس سے میاں بیوی کے رشتے میں دراڑ آجاتی ہے اور کبھی کبھی پورا خاندان متاثر ہو جاتا ہے اور یہ کہ گھریلو معاملات یا باتوں سے باہر کے لوگ یا رشتے دار وغیرہ واقف ہو جاتے ہیں جس کے بسا اوقات خطرناک نتائج نکلتے ہیں۔ قرآن کریم نے اس سلسلے میں جو رہنمائی کی ہے وہ صرف مردوں کے لیے نہیں ہے ۔

ارشادِ ربانی ہے :

یا ایھا الذین اٰمنوا اجتنبوا کثیرا من الظن ان بعض الظن اثم و لا تجسسوا ولا یغتب بعضکم بعضاً ا یحب احدکم ان یاکل لحم اخیہ میتا فکرھتموہ و اتقوا اللہ ان اللہ تواب رحیم (الحجرات:12)

“اے ایمان والو !بہت بدگمانیوں سے بچو یقین مانو کہ بعض بدگمانیاں گناہ ہیں۔ اور بھید نہ ٹٹولا کرو اور نہ تم میں سے کوئی کسی کی غیبت کرے۔کیا تم میں سے کوئی بھی اپنے مردہ بھائی کا گوشت کھانا پسند کرتا ہے؟ تم کو اس سے گھن آئے گی، اور اللہ سے ڈرتے رہو،بے شک اللہ توبہ قبول کرنے والامہربان ہے”

(9)بچوں پر منفی اثرات

ان تمام باتوں کا بچوں پر بھی نمایا ں اثر پڑتا ہے۔ان کی تعلیم و تربیت صحیح ڈھنگ سے نہیں ہو پاتی ہے کیوں کہ جب ایک ہی گھر میں مختلف سوچ رکھنے والے ہوتے ہیں تو بچے کشمکش کا شکار ہو جاتے ہیں کہ کس کی بات صحیح ہے اور کس کی غلط؟اس سے ان کی خود اعتمادی مجروح ہوتی ہے اور آگے کی زندگی میں ان کو نقصان اٹھانا پڑتا ہے۔ بعض دفعہ بچوں کے بگڑنے میں وجہ یہ رہتی ہے کہ بزرگ مرد یا خواتین، بچوں کو ڈانٹنے یا مارنے نہیں دیتے اور ان کی غلطیوں کی چشم پوشی کرتے ہیں،اس سے بچے بگڑ جاتے ہیں۔

اس کے علاوہ اس طرح کے خاندانی نظام میں بچوں،بچیوں کے ساتھ جنسی زیادتی کے معاملات زیادہ ہوتے ہیں اور اس میں قریبی رشتے داروں کا ہی ہاتھ ہوتا ہے جو ان کے درمیان رہا کرتے ہیں کیوں کہ بچے،بچیاں اجنبی لوگوں کے مقابلے میں مانوس لوگوں سے زیادہ گھلتے ملتے ہیں۔ماں باپ بھی ساتھ رہنے والوں پر اندھا اعتماد کرکے انھیں ان کے پاس چھوڑ دیا کرتے ہیں جس کا خمیازہ انھیں بھگتنا پڑتا ہے۔

ایک مسئلہ اس طرح کے نظام میں بھی یہ ہوتا ہے کہ جن لوگوں کی کمائی کم ہوتی ہے ،خودان کے لیے اور ان کی بیوی بچوں کے لیے بھی مصیبت کھڑی ہو جاتی ہے اور بعض دفعہ وہ اپنے ہی گھر میں اجنبی بن جاتے ہیں ۔ ظاہر ہے کہ زیادہ کماﺅ پوت کی مان جان بھی زیادہ ہوگی۔اس سے سب سے زیادہ بچے متاثر ہوتے ہیں کہ ان کی اہمیت یا قدر صرف اس وجہ سے نہیں ہوتی ہے کہ ان کے والد نہیں کما رہے ہیںیاکم کما رہے ہیں۔اس وجہ سے ان میں دوسروں سے حسد،بغض اور نفرت کا جذبہ پیدا ہو جاتا ہے۔

اسلام نے ان وجوہات کی بنا پر مشترکہ خاندانی نظام کی حوصلہ شکنی کی ہے اور آسان طرزِ زندگی اپنانے پر زور دیا ہے۔ یہ تب ہی ممکن ہے جب خاندان چھوٹی چھوٹی ٹکڑیوں کی شکل میں رہیں چاہے یہ حجرہ( فلیٹ) کی شکل ہی میں کیوں نہ ہو جیسا کہ آپ کا طریقہ تھا۔

بہت ممکن ہے کہ بعض لوگوں کے ذہن میں یہ خیال آئے اگر مشترکہ خاندانی نظام کو نہ اپنایا جائے تو والدین کہاں جائیں گے اور ان کے حقوق کی ادائیگی کیسے ہوگی؟کیوںکہ ایسا کرنے سے وہ بالکل تنہا اور بے سہاراہو جائیں گے، تو یہ بات ذہن میں رہنی چاہیے کہ والدین کے حقوق کو ادا کرنے کا مشترکہ اور غیر مشترکہ خاندانی نظام سے تعلق نہیں ہو تا ہے،بلکہ اس کا تعلق خوفِ خدا اور اللہ اس کے رسول کی اطاعت و فرمابرداری سے ہے۔یہ لازمی نہیں ہے کہ مشترکہ خاندانی نظام ہی میں اولاد اپنے والدین کا حق ادا کر سکتی ہے اور جداگانہ نظام میں نہیں۔

آج کل باآسانی ایسے فلیٹ بنائے جا سکتے ہیں جن میں سب کے لیے الگ الگ یونٹ ہو۔ایسے والدین اور دوسرے رشتے داروں کے حقوق کی ادائیگی بھی ہو جائے گی اور مشترکہ خاندانی نظام کے مضر اثرات سے بھی بچا جا سکتا ہے۔ورنہ عموما دیکھا یہ جاتا ہے کہ مشترکہ خاندانی نظام میں والدین ایک کونے میں پڑے رہتے ہیں اور سب لوگ ایک دوسرے پر ذمہ داری ڈالے مگن رہتے ہیںیا پھر باری لگا دی جاتی ہے کہ اتنے سے اتنے دن ایک بہو سنبھالے گی اور بقیہ دن دوسری بہو۔جس کا نتیجہ یہ ہوتا ہے کہ بہویں بس کام ٹھکانے لگاتی ہیں جس سے حساس طبیعت والے والدین ایک الگ ہی کرب سے گزرتے ہیں۔جب کہ اولاد کا والدین پر یہ حق ہے کہ وہ ان کے ساتھ نیک اور اچھا سلوک کریں۔ان کی اطاعت کریں اور ان کا احترام کریں۔ارشادِ ربانی ہے:

ووصینا الانسان بوالدیہ احسٰنا(الاحقاف:15)

“ہم نے انسان کو ہدایت دی کہ وہ اپنے والدین کے ساتھ نیک برتاﺅ کرے”

ایک شخص نے نبی ﷺ سے پوچھا :

من احق الناس بحسن صحابتی؟قال امک،قال ثم من؟قال امک، قال ثم من؟ قال امک، قال ثم من؟ قال ابوک(بخاری:5981)

“میرے حسنِ سلوک کا سب سے زیادہ مستحق کون ہے؟آپ نے فرمایا:تمہاری ماں۔اس نے کہا اس کے بعد کون؟فرمایا تمہاری ماں۔اس نے کہا اس کے بعد کون؟فرمایا تمہاری ماں۔اس نے کہا اس کے بعد کون؟فرمایا تمہارا باپ”۔
آپ نے والدین کے ساتھ بدسلوکی کو کبیرہ گناہوں میں سے سب سے بڑا گناہ قرار دیا ہے اور جب والدین بڑھاپے کو پہنچ جائیں تو اس وقت ان کے ساتھ اچھا برتاﺅ کرنے کی بڑی تاکید فرمائی ہے کیوں کہ اس وقت ان کو سہارے کی سخت ضرورت ہوتی ہے۔قرآن کریم نے اس کو اپنے خاص انداز میں بیان کیا ہے:

و قضٰی ربک الا تعبدوا الا ایاہ و بالوالدین احسانا، اما یبلغن عندک الکبر احدھما او کلاھما فلا تقل لھما اف و لا تنھر ہما و قل لھما قولا کریما۔ و اخفض لھما جناح الذل من الرحمة و قل رب ارحمھما کما ربیانی صغیرا(الاسراء:23،24)

“تیرے رب نے فیصلہ کیا ہے کہ اس کے سوا کسی کی عبادت نہ کرو۔اور والدین کے ساتھ نیک سلوک کرو۔اگر ان میں سے کوئی ایک یا دونوں تمہارے پاس بڑھاپے کو پہنچ جائیں تو نہ انھیں اف کہو اور نہ جھڑکو بلکہ ان سے شریفانہ بات کہو۔ اور ان کے لیے رحمدلی کے ساتھ پستی کے بازو جھکائے رہو اور دعا کرتے رہو کہ ائے میرے رب!ان پر رحم فرما جس طرح انہوں نے بچپن میں مجھے پالا تھا”

آج کے دور میں عموما بچے جہاں بڑے ہوئے اور نوکری مل گئی تو ماں باپ کو تنہا چھوڑ کر چل دیتے ہیں اور بیوی کو بھی پاس بلا لیتے ہیں۔مروتا ً والدین کوپوچھ بھی لیا تووہ حالات کو سمجھتے ہوئے اجنبی جگہ یا اپنے گھر کی یادوں کا بہانا کرکے ٹال دیا کرتے ہیں۔

ضرورت اس بات کی ہے کہ قرآن مجید ، سیرتِ رسول اور صحابہ کرام کی زندگی کے حوالے سے اسلامی خاندانی نظام کے تصور کو دنیا کے سامنے عملی شکل میں پیش کیا جائے ۔ اس لیے کہ اس وقت دنیا کو اسی کی ضرورت ہے۔

٭٭٭٭